HUMMERÅS:

ANGEN AV SOMMAREN SEKSTISEKS 

hundedagar,
kløe av mygg, fluger i glaset, solbrende 
armar, vepsestikk, blåmerka legger, 
kortbukser, oppskrubba olbogar  
-  skorper på kne gjev status

favorittklatretreet,
hyttesnikring i storbøken, stintesnøre frå 
brygga, kasteboks i fra svaberget, robåt å 
låne mot eit parti sjakk, tåkeluren frå 
Lista-fyren, regn på bølgjeblekktak  
- kjelda i Kjøldel går aldri tom

slåttevêret,
graset, biesong, lyden av sommar, songen av 
langorv som kvesses, høybøra, angen av høy, 
hesjer,  høysåter, lynet som råka han i skallen 
på veg med dagens siste bør  
-  den og dagen blei hans aller siste

høyløeleik,
tunnellar i stikkande strå, sove i høyet, auge 
som klør, småbudeier i høyet, skjørt og tynne 
bluser, hopping i høy, luft- og annan akrobatikk  
-  erotikk visste vi ikkje av

moreld i sjøen,
vabler i hendene, nymånesigd, eit hav av makrell, 
sløying av fisk, iltre terner, masete måsar, 
brattbakken heim, ange av bjørkeved og mjødurt  
-  snart krøller makrellen seg i panna